Friday, April 28, 2017

Цэцэгнээс жижигхэн хар ялаа нисээд байна уу?

Сциарид нь жижигхэн шумуул/ялаа/ (0,5—3 мм) юм. Өнгө нь ихэвчлэн саарал болон хар. Далавчтай, далавчгүй гэж байдаг. Томорсон үедээ хоололдоггүй тул цэцэгэнд хор хөнөөлгүй. Чийгтэй хөрсөнд өндөгөө гаргадаг. Хэд хоногийн дараа өт хэлбэртэй хөлгүй, 2-10 мм урттай авгалдайнууд гарч эхэлдэг. Өтний гэдэс толгой нь нэвт харагддаг. Үүгээр нь энэ ялааны авгалдайг бусад өт, цагариган хорхойноос ялгаж болдог байна. Авгалдай, өндөг нь хуурай хөрсийг тэвчиж чаддаггүй. Чийгтэй шорооноос гаргахад хэдэн минутын дотор үхдэг байна. 
Сциарид гэх энэ ялаа нь савтай цэцгэнд ариутгаагүй хөрсөөр дамжин ордог. Эсвэл цонхоор орж ирж чийгтэй хөрсөнд өндөгөө үлдээдэг. Бүрмөсөн энэ ялаанаас салж болдоггүй байна. Үржих, хооллох орчин нь байхад цацсан хорны үйлчилгээ дуусангуут буцаад нисээд эхэлдэг. 
Чийгтэй хөрс, хөрсөн дэх ялзарч байгаа органик бодис нь энэ ялааны үржих орчин болдог гэнэ.
Гэхдээ хүнийг хазахгүй. Ер нь бол ургамалд ч айхтар хор хөнөөл байхгүй гэж үздэг. 
Хөрсөнд амьдардаг, ялзмаг болон органик бодисоор хоололдог. Ялангуяа навчин хөрс, ялзмаг, компосттой хөрсөнд илүү дуртай. Хөрсөнд мөчир, модны үртэс байвал энэ ялаанд үүрлэх үржих cайхан орчин болно.
Ялаа нь хөрсний өнгөн хэсэгт 5-8 см гүн байралдаг. Иймээс усалгаа хооронд хөрсний өнгөн үеийг хатаах сайн байдаг. Үржиж амьдрах гол нөхцөл нь - чийгтэй хөрс. Иймд хөрсийг хатаах нь бага зэрэг ч болов үржлийг нь хянахад тус болно.
Нэг ялааны амьдрах хугацаа 7 - 10 өдөр. Энэ хооронд нэг ялаа нийт 200 өндөг гаргадаг байна. Өндөг, авгалдайнууд нь том ялаа болтол 2 -3 долоо хонодог, ингээд бүтэн жил дулаахан гэрт үржээд байна.
Ихэнхдээ намар, өвөл илүү үржиж байгаа нь мэдрэгддэг. Учир нь гадаа байгаа цэцгүүдээ намар гэрт оруулдагтай холбоотой. Гадаа байсан ялаа нь хуурай, дулаан гэрт орж ирээд бүүр их таатай үржиж эхэлнэ.
Том болсон ялаа нь ургамалд муугаар нөлөөлөхгүй ч авгалдай нь ургамлын үндэс идээд байдаг. Мөн том ялаа ч тэр, авгалдай нь ч тэр бусад цэцгэнд өвчин тараадаг. Иймээс цэцэг суулгахдаа заавал ариутгасан хөрс, ариутгасан сав хэрэглэж байна.
Хор хөнөөл
Цэцгийг зөв арчилж байхад цэцгэнд учруулах хор хөнөөл нь бага байдаг. Жирийн үед авгалдай нь ялзарч буй органикаар хоололдог. Хэрэв олноороо үржиж байгаа тохиолдолд цэцэгний хэсгээр хооллож эхэлдэг. Зарим төрлүүд нь, жишээ нь өргөст хэмхийн ялаа (Bradysia brunnipes Mg.) болон хүлэмжний ялаа (Plastosciosa perniciosa Edv) зөвхөн үндэсээр болон цэцэгний хөрстөй нийлсэн хэсгээр хоололдог байна.
Урьдчилан сэргийлэх болон устгах арга зам:
Бүрмөсөн устгагддаггүй, дахин дахин гарч ирээд байдаг. Хор хөнөөл нь тасалгааны цэцгэнд айхтар их биш ч олноор үржээд эхлэхээр хэцүү асуудал болно. Олноор үржиж байгаа нь муу агро арчилгаа хийсний шинж. Хөрсөнд бүрэн ялзарч дуусаагүй органик гаралтай зүйлс хийхээс болгоомжил: цэцэгний унасан навч, цэцэг, илжирсэн үлдэгдлүүд г.м.
Устгах арга хэмжээнд орхоос өмнө сциарид ялаа мөн биш гэдэгийг тогтоох хэрэгтэй. Учир нь жимснээс гаралтай бас ижил ялаа байдаг. Жимсний ялаа нь муудсан жимсний чанамал, компот, хэт боловсорсон жимсний үнэрээр нисч ирдэг Дрозофила нэртэй ялаа гэнэ.
Хөрсөө сийрэгжүүлж байх.


Шинэ ариутгасан сав, хөрсөнд суулгах. Халдвартай хөрс, булцуу, үндэс гэх мэт зүйлүүдийг устгах.

Дараагийн арга нь услах усандаа цитромон эсвэл аскофен (3 литр усанд тал эм) найруулж услах.

Шар өнгийн наалддаг цаас тавьхад илүү ялаа, хорхой цуглардаг байна. Ялааны наалддаг хор хөрсний дээгүүр, цэцэгний савны дээр тойруулаад эвтэйхэн тавьж өгдөг.

Цэцгэнд агаарын чийг ихэсгэх гэж тавьсан подностой усанд олноор орж үхсэн байдаг юм. Иймээс ялаа нисээд байвал подностой сав шууд тавьж эхэлдэг. Нисэж байгаа ялааг ийм аргаар түүж устгаад, хөрснөөс шинээр гарсан нь мөн адил наалдаад бага багаар цөөрсөөр, яваандаа 3-4 долоо хоногийн дотор алга болдог.

Мөн алимны цуу (винегар/уксус)-г шингэн аяга таваг угаагч савангийн дусалтай холиод цэцэгний хажууд тавьбал олноороо ингэж устдаг.

Хэрэв алины цууны үнэр хэт хурц, танд таалагдахгүй байвал дарсаар орлуулж болно.

Ямар ч шинэ цэцгийг шинээр авахдаа карантинд байлгах хэрэгтэй. 7 хоног тусад нь өөр өрөөнд тавьж элдэв өвчинтэй үгүй, хорхой шавьжтай үгүй зэргийг мэддэг.
Ялаа өндөгөө өнгөн хөрсөнд цацдаг. Иймээс хөрсний өнгөн хэсгийг 2-5см гүн хатааж байж дараагийн услалгааг хийж байвал үржих нөхцлийг багасгаж өгч байгаа.
Усалгааг доороос хийж байх. Гэхдээ энэ ялаа дренажны нүхээр орж бас үүрлээд байдаг. Иймд дренажны нүхрүү орхооргүй болгох хэрэгтэй.


Мөн үүрэлсэн цэцэгтэй савыг олох хэрэгтэй. Усалгаа эхэлхээс өмнө ус шүршихэд ялаа нисэж эхэлнэ, аль цэцэгнээс илүү гарч ирээд байна гэдгийг тодорхойлж авна. Эсвэл усалгаа хийхээс өмнө цэцэгний савыг сайн тоншиж өгөх, эсвэл бага зэрэг хүчтэй хөдөлгөхөд дренажны нүхнээс ялаанууд унаж харагддаг.
Аль цэцгэнд үүрэлснийг мэдээд авсан бол энэ цэцгийн хөрсийг шинээр солих хэрэгтэй - савыг ариутгаж, шинэ хөрсөө мөн ариутгана, цэцэгний иш, үндэсийг урсгал усанд сайн угаагаад марганцтай усанд 1-2 цаг болгоно. Хуучин хөрсөө ч гэсэн ариутгаад хатаагаад өөр цэцгэнд хэрэглэж болно.
Шумуулын эсрэг хэрэглэдэг, цахилгаанд залгадаг жижигхэн фумигатор залгаж болно. Нисэж байгаа хэдийг устгана, харин хөрсөнд байгаа авгалдай, өт зэргийг давхар хороор устгаарай.

Би заримдаа цэцэгнүүдээ аяга таваг угаадаг шингэн дусаасан усаар усладаг. Ингэснээр хөрсөнд хуримтлагдсан элдэв хужир, давс доош уусаж урсдагаас гадна жижиг өндөг авгалдайнуудыг мөн устгадаг. 

За тэгээд дээрх энгийн аргууд үйлчлэхгүй байвал химийн аргаар устгах үлдэнэ.
Ялаанаас салах нь нэг удаагийн үйлдлээр алга болгохоор амар зүйл биш. Тэр их үржсэн өндөг, авгалдайнуудыг удаа дараа хор хэрэглэж устгана.
Том ялааг устгадаг зүйл нь авгалдайг алдаггүй. Гол нь өндөг гаргаад байгаа том ялаанаас салах. Тэгэж байж ялааны тоог бууруулна. Үүнд зарим химийн хор хэрэг болно. Цэцэгрүүгээ хор цацах хэрэггүй. Бүх зүйл савтай хөрсөнд байгаа тул хороор услана. Хорны уут дээр хэд хоноод дараагийн давталтыг хийхийг бичсэн байдаг. 
Урьдчилан сэргийлэх үүднээс дахиж үржүүлэхгүйн тулд шинээр авсан цэцэг, ургамлаа юуны түрүүнд хороор услах нь дээр байдаг.

Бусад бичлэгүүд:
Fairy-гээр цэцэг услаж болох уу?

Кроссандра үрээр тарих нь

Кроссандрагийн үр том тул ургуулахад амархан. Юуны түрүүнд 3 цаг бүлээн усанд, эсвэл бүдэг ягаан өнгийн марганцын бүлээн уусмалд дэвтээнэ. Үүний дараа үр бойжуулагчинд, эсвэл жирийн хөнгөн, агаар сайн нэвтэрдэг, том ширхэгтэй элс, хүлэрт хөрс бэлдээд суулгана. 
Нэг ийм уутандаа 3 ширхэг үр байдаг. Үрний хэмжээ чүдэнзний толгойтой дүүцэхээр том. Чийгтэй хөрсөн дээр үрнүүдээ байрлуулаад дээгүүр нь жирийн элсээр 0,5 см хучина. Үр +20-22°С хэмд ургадаг. Сайн чийгшэлт бүрдүүлж өгнө, өөрөөр хэдбэл дээгүүр нь гялгар уутаар бүтээх, г.м. вакумдана.
Дунджаар 15-20 хоноод соёолдог. Шинэхэн үр бол 4-5 хоноод соёолдог. Услахдаа ус шүршигчээр усласан нь дээр. 
Соёолсноос хойш 30 хоноод жижиг саванд (5-6 см диаметртэй) тусгаарлана. Томрох явцад чимхэж байна. Савандаа багтахгүй болоод ирвэл 10 см саванд шилжүүлж суулгана. Шилжүүлж суулгахдаа илүү тэжээллэг, ялзмагтай хөрс авна. 
Кроссандраг гал тогооны өрөөнд байлгах хэрэггүй. Учир нь шарсан хуурсан зүйлээс агаарт ялгарах хийнд ургадаггүй. Нэвт салхинд тавьж болохгүй. Хэт сэрүүн газарт ус чийгийг нь ихдүүлвэл амархан илжирнэ.
Томрох тусам тусад нь ганцаар байрлуулах хэрэгтэй. Шигүү байрлуулсан цэцэгний дунд амархан өвчлөөд байдаг. Нил цэцэгний дунд тавьж болдог.
Услахдаа жаваргүй усаар услана. Крантны хүйтэн ус цэцгийг үхүүлдэг. Хөрсний өнгөн үе доош 1-2 см хатангуут дараагийн усалгааг хийдэг. Энэ нь ойролцоогоор зуны улиралд долоо хоногт нэг удаа, өвөл - 2 долоо хоногт нэг удаа байдаг. Ус хэтрүүлж болохгүй. Гэрийн нөхцөлд үрэлдэг.

Tuesday, April 25, 2017

Сансевиерия - Мөнхрөө

Сансевиерия (Sansevieria) манайхан Мөнхрөө гэдэг. Оросууд «хадам ээжийн хэл», «чонын сүүл», англичууд «барсын сараана», «чөтгөрийн хэл», «могойн ургамал»; америкчууд – «могойн арьс»; германчууд – «африк олс» гэж олон янзаар нэрлэдэг байна. Латин нэр нь сансевиерия, мөн сансевьера гэдэг, аль аль нь зөв юм байна. 
Италийн хун тайж Раймондо ди Сангро Сан-Севериногийн нэрээр нэрлэжээ. Тэрээр XVIII зуунд амьдарч байсан ба ургамал судлалын хөгжилд багагуй хувь нэмэр оруулсан нэгэн гэнэ. 
Эх нутаг - Ази тивийн халуун бүс, Африкийн Конго голын орчин.
Сансевиерия – олон наст мөнхийн ногоон, эгц ургадаг, 1м гаруй өндөр хүрдэг, навчаар гоёдог ургамал. Ойролцоогоор 60-70 төрөл байдаг, үүнээс 10-аадыг тасалгаанд ургуулдаг байна. Арчилгаа сайн хийвэл гэрт цэцэглэдэг. Ургалт - дунд зэргийн.
Мөнхрөөгийн үндэс сайн хөгжсөн, гэхдээ өнгөцхөн, доош гүн ургадаггүй. Зарим томорсон үндэс цэцгийн савыг хагалж чаддаг. Ихэнхи төрлийн навчны үзүүрт хатгуур байдаг. Навчны урт 1 метр болон түүнээс урт ургадаг. Навчны өнгө янз бүр, сүүлийн жилүүдэд шинэ шинэ хээтэй, туяатай сортууд гаргаж аваад байгаа. 
Цэцэг нь хүний нүд татахаар үзэмжтэй биш. Орой үдэш дэлгэрдэг, ваниль шиг нялуун анхилуун үнэртэй. Цэцэг болон цэцэгний иш үнэртэй шингэн ялгаруулдаг. Байгальд үүгээрэй хорхой шавьж татдаг байна. 
Хамгийн гоё цэцэгтэй нь Сансевьера Кирка. Жимс нь дотроо 1—3 үртэй, тасалгаанд үр боловсрох нь ховор. Мөнхрөөг гидропоникийн аргаар ургуулахад маш сайн тохирдог.
Нутагт нь мөнхрөөгөөр амьд хашаа хийж ургуулдаг байна. Навчнаас нь техникийн олс гаргадаг. Аборигенууд ийм олсоор нум хийдэг байжээ. Мөнхрөөг мөн эмчилгээнд хэрэглэгддэг. Өндгөвчний үрэвсэл, цистит, ханиад томуу, вирусын гаралтай өвчлөлүүд анагаахад болон эсэргүүцэл сайжруулахад хэрэглэдэг байна. 
XVIII-р зуунаас Европт ургуулж эхэлсэн. Цэцэг тарьж эхэлж байгаа хүмүүст тохирсон, онцын тусгай арчилгаа шаардаад байдаггүй ургамал.
ТӨРӨЛ
- Sansevieria grandis Hook. f. - ХХ-р зуунаас тарьж эхэлсэн. Үүний нэг хэлбэр Sansevieria grandis var. zuluensis.
Sansevieria grandis S. grandis var. zuluensis
- Sansevieria hyacinthoides 0-5 м өндөр. 
- Sansevieria dooneri N. E. Br. - Ксерофит суккулент.
- Sansevieria gracilis
- Sansevieria kirkii Baker 
- Sansevieria liberica Gerome & Labroy
- Sansevieria trifasciata Prain 3 судалт 
- Sansevieria cylindrica
  
- Sansevierra Robusta

АЧ ХОЛБОГДОЛ 
Агаар цэвэрлэдэг "Номер 1" ургамал. Ногоодойгоос илүү цэвэрлэдэг ургамал байна. Албан газарт ургуулахад үзэмжтэйгээс гадна маш хэрэгтэй. 

 
АРЧИЛГАА
Гэрэлд мөнхрөө айхтар шаардлага тавиад байдаггүй. Сүүдэрхэг, хагас сүүдэрхэг газар ургаж чаддаг. Гэхдээ гэрэлсэг газар байх нь дээр. Хэт тод гэрэлд ганган алаг хээ сулардаг. 
Нарны хурц гэрэлд навч түлэгдэж болно. Алаг навчтай төрлүүдийг хагас сүүдэрхэг/гэрэлсэг газар байлгаж болно. Харин сүүдэрхэг болон харанхуй газар навчны алаг хээ алдагдаж жигд ногоон өнгөтэй болно. Зүүн, баруун зүгийн цонх илүү тохирдог.
Агаарын дулаан зун +18-25°С, өвөл +14-16°С байхад болно. +10°С хэмийг дааж чаддаг, гэхдээ энэ үед ургалт зогсдог. Удаан хугацаагаар ийм сэрүүн газар байлгавал ургамал өвчилдөг.
Агаарын чийгшил: хуурай агаарт тэсвэртэй. Гэхдээ навчны тоосыг чийгтэй алчуураар арчиж өгвөл илүү цэвэрхэн, тордсон, тод харагдахаас гадна навчин дээр тогтсон төрөл бүрийн хорхой шавьжнаас болон илжрэлтээс хамгаална. Мөн зөөлөн усаар шүршиж болно, гэхдээ заавал биш.
Усалгаа: хэт их чийгтэй хөрсөнд дургүй. Зун - ойролцоогоор 7 хоногт нэг удаа, өвөл - 21 хоногт нэг удаа тус тус услахад болно. Услахдаа цэвэрхэн услана. Бутны голруу ус оруулж болохгүй. Амархан илжирдэг. 
 
"Эрүүл орчин-ногоон офис"
Бордоо: зун - 3 долоо хоногт нэг удаа тасалгааны цэцэгт, эсвэл кактуст зориулсан бордоог зааварт зааснаас нь 2 дахин шингэн найруулж байгаад хэрэглэнэ. Ойр ойрхон бордох буруу. Хэт их бордооноос үзэмжээ алддаг. Навчны алаг хээ/судал алдагдаж жигд ногоон өнгөтэй болно.
Цэцэглэлт: мөнхрөө ямар ч улиралд цэцэглэж болно. Цэцэгний иш сорт бүрд өөр өөр. Цэцэглэж дуусангуут ишнийх нь доогуур тайрна. 
Төрөл бүрийн мөнхрөө оролцуулсан зохиомж

Амралт үед онцын мэдэгдэх өөрчлөлт гарахгүй. Намар - өвөл +14-16°С хэмд, сайн гэрэлтэй газар тавьна, усалгааг бага хийнэ, огт бордохгүй. 
Хөрс: мөнхрөөд хар шороотой болон ялзмагтай навчин хөрс, элстэй тохирно (2:2:1).
Алаг навчтай мөнхрөөг үржүүлэх тухай

Шилжүүлж суулгах: Үндэс савнаас гадагш цухуйж эхлэвэл шилжүүлж суулгана. Үүнийг хавар хийнэ. 
Мөнхрөөний үндэс хажуу тийш салаалж, гүехэн ургадаг. Доош гүн явадггүй. Иймд сав нь өргөн, өндөр биш байхад таардаг. Савны ёроолд заавал дренаж (савны өндөр 1/4-т) хийнэ. Хэрэв цэцэглүүлэх сонирхолтой бол том сав авах хэрэггүй. 
Үрслүүлэх арга: 
Мөнхрөөг хажуугийн ургасан зулзага салгаж, үндэс хувааж, үрээр, мөн навчаар үржүүлдэг. 
Үрээр үржүүлж байгаа нь
Алаг, эрээн навчтай төрлүүдийг ихэнхдээ хажуу зулзаган бутаар мөн үндэс хувааж үржүүлнэ. 
Хажуугийн зулзага салгаад модны нүүрсний нунтагаар гэмтсэн үндэсний хэсгүүдийг бүрж өгвөл өвчлөхгүй.




Үндэс хуваахыг хавар шилжүүлж суулгах үед хийнэ. Үндсийг хурц хутгаар зүсэж авна. Салгасан хэсэг бүрийн дээр ургах цэг байх ёстой. Хөрсийг гөвөх хэрэггүй. 
Зүсэлт хийсэн газруудад модны нүүрсний нунтаг түрхэнэ. Дараа нь элсэнд суулгана. Том ширхэгтэй, голын элс байвал сайн. Дулаахан газар байрлуулаад, усалгааг хэтрүүлэхгүй тохируулж байна. Шинэ нахиа гарч ирвэл том саванд шилжүүлж суулгаж болно гэсэн үг. 
Навчаар үрслүүлэх бол хөгшин навч тасдаж авна. Тэгш гадаргуй дээр байрлуулж байгаад хурц хутгаар 5-7 см урт хэсгүүдэд хуваана. Дараа нь тасалгааны температурт ил байлгаж (2-3 цаг) зөөлрүүлнэ. Үүний дараа чийгтэй элсэнд 1/3 гүн суулгана. Дээгүүр нь вакумдаж болно. Ил тавьж ч болно. Үндэслүүлэх явцад элсээ дахиж услах хэрэггүй. Усыг зөвхөн доод тосгуур саванд хийж байна. Ойролцоогоор 6-8 долоо хоногийн дотор үндэслэнэ. Үндэслэсний дараа жирийн хөрсөнд суулгана. 
Шар судалтай мөнхрөөг навчаар үрслүүлхэд нэг онцлог байдаг. Дээрхтэй адил навчийг 3-4 см урт зүсэж авна. Хөрсөнд суулгах хэсгийг дугуйлж (саран хэлбэртэй) зүснэ. Ингэснээр 2 шар "хөлтэй" навчин хэсэг болно. 
Бага зэрэг хатаагаад, зөөлрүүлээд, хөрсөнд суулгана. Суулгахдаа зөвхөн энэ 2 "хөлийг" л булна. Вакумдах хэрэггүй. Хөрсийг тогтмол, жигд өлөн чийгтэй байлгана. Хэт усархаг биш, гэхдээ хатааж огт болохгүй. Ойролцоогоор 1-1,5 сарын дараа энэ шар зураасны доороос залуу нахиа гарч ирнэ. Ингэж суулгасан мөнхрөө шар алаг навчаа хадгалж ургадаг.
Бут шинэ саванд суулгах явцад салж унасан навчийг хажууд нь зүгээр зоочихсон юм. 3,5 сарын дараа нэг ийм зулзагатай. Алаг хээ хадгалагдах үгүйг удахгүй үзнэ ээ.
Үрслүүлж байгаа хэсгүүдийг гэрэлтэй газар тавьдаг. Гэхдээ нарны шууд гэрэлд тавьж болохгүй. Хутга хурц байх тусам зүсэлт жигд, цэвэрхэн хийгддэг. Энэ нь илжрүүлдэггүй юм. Мөн хэрэглэхийн өмнө хутгаа спиртээр ариутгана. Суулгах элсээ мөн ариутгасан байх ёстой ба мөөгний өвчлөлт, илжрэлтээс сэргийлж фунгицид бодисоор услахад илүүдэхгүй.
Анхаарах зүйл
Мөнхрөө 3 судалт - хортой ургамал. Сапонин гэх бодис агуулдаг. Хордсон үед дотор эвгүйрэх, бөөлжих, огих зэрэг болно. Бага насны хүүхэд навч амандаа хийхээс сэргийлэх хэрэгтэй. Арьсанд шүүс хүрхэд зүгээр.

Гарч болох хүндрэлүүд: 
Навч зөөлрөөд, шарлаад, үхээд байна – ихэнхи тохиолдолд хөрс хэт чийгтэй байлгасан, эсвэл навчин тавагны дотогш ус хийсэн; 
Хөрс хуурай байхад навч унжийгаад, илжрээд байна – хэт сэрүүн, хүйтэнд байлгасан;
Мөнхрөөгөөр суурийг нь чимэглэсэн байгаа нь
Навчин дээр бор толбо үүсээд байна – хөрс хэт чийгтэй, эсвэл хэт харанхуй, сүүдэрхэг газар байрлуулсан;
Навчин дээр шар хүрээтэй улаан-бор толбо үүсээд байна – мөөгний гаралтай өвчин туссан; 
Хорхой шавьжнаас аалзан хачиг, "трипс" үрждэг. Навчийг тогтмол чийгтэй алчуураар арчиж байна.
 
Хорхой шавьж байхгүй. Навчны зөөлөн эд ингээд хоёр талаасаа адилхан идэгдээд, цаас шиг юм үлдэв. Бактерийн эсвэл мөөгний гаралтай толбо гэнэ. 3-4 удаа фунгицид бодисоор шүрш (Фитоспорин, Фундазол, Скор, Максим) гэж байна.
 
http://bezlji.com/sansevieriya/,
http://www.floralworld.ru/forum/index.php?topic=1142.60,
http://floralworld.ru/encyclopedia/plants/Sansevieria.html, 
http://greenhome.org.ua/